Pressemitteilung vom 26. Oktober 2020

Heinrich Thies hett den Quickborn-Pries 2020 kregen

Heinrich Thies ut Glinn (Glinde) in Sleswig-Holsteen is mit den Quickborn-Pries vun de Sporkassenstiften in Neddersassen tohoop mit de Vereenigung Quickborn för nedderdüütsche Spraak un Literatur in Hamborg ehrt worrn. Den Pries hebbt em Dr. Arne Butt vun de Sporkassenstiften un Rolf-Dieter Klooß vun de Quickborn Vereenigung na Huus bröcht, wieldat en grote Priesfier in’t Freelichtmuseum Kiekebarg so as in anner Johren wegen de Corona-Süük dütmol nich to maken weer.

De Maten vun de Jury weern sik mit ehr Loff eenig, dat Heinrich Thies (82) den Pries verdeent hett, wieldat he vele Johrteihnte de nedderdüütsche Spraak mit veel Knööv Stütt geven hett. Sünnerlich hett he sik dorför insett, dat de Lüüd dat Plattdüütsche nich minnachtig ansehn hebbt un dat de Spraak en seker Rechtspositschoon kregen dee. So weer he een vun de Drievers, as dat üm de Opnahm vun Nedderdüütsch in de Europäische Charta vun de Regional- un Minnerheitenspraken un in de Lannesverfaten vun Sleswig-Holsteen güng. Un mit siene stüttige Arbeit an dat Plattdüütsche Wöörbook un an de Plattdüütsche Grammatik (SASS) hett he bannig holpen, dat een beter de nedderdüütsche Spraak lehren kann.

Rolf-Dieter Klooß (Quickborn Vereenigung) see, dat sik Heinrich Thies grootoorig üm de nedderdüütsche Spraak verdeent maakt harr; mit groot Engagement weer he op de Rebeden vun Sellschop, Politik un Spraakwetenschop düchtig vörankamen.

De Quickborn-Pries warrt alle twee Johr för verdeente Leistungen op dat Rebeet vun Nedderdüütsche Spraak, Literatur un Forschung in de Volkskunn utgeben.

De Maten vun de Jury för den Quickborn-Pries 2020 weern:

  • Rolf-Dieter Klooß (Quickborn Vereenigung, Vörsitter vun de Jury)
  • Arne Butt (Sporkassenstiften in Neddersassen)
  • Marianne Ehlers
  • Volker Holm
  • Johanna Kastendieck
  • Herma Koehn
  • Dirk Römmer

 

Ansprechpartner
Martina Fragge Tel.: 0511/36 03 - 4 94
Download