Heike Müns schall den Quickborn-Pries vun de Sporkassenstiften Neddersassen för 2010 kriegen

Pressemitteilung vom 19. März 2010

Heike Müns, Berlin/Ollnborg, ward mit den Quickborn-Pries vun de Sporkassenstiften in Neddersassen för 2010  uttekent. För den Pries gifft dat 2.000 Euro. He ward all twee Johr vergeben, nu al to'n drütten Mol. Fierlich öbergeben ward de Pries an'n 11. Juni 2010, vörmiddags Klock 11, in't Freelichtmuseum an'n Kiekebarg in Seevetal/Rosengoorn.De Loffreed höllt Prof. Dr. Rolf W. Brednich, Wellington, Nieseeland. Gerhard Oestreich as Vertreder vun'n Vörstand bi de Spoorkass Horborg-Buxthuud ward den Pries öbergeben. 

Heike Müns stammt ut Bad Doberan. As se in Rostock Germanistik un Musikwetenschop studeert un ehr Staatsexamen schafft harr, hett se eerstmol bet 1977 in'n Schooldeenst in Rostock arbeid. Vun dor op an weer se in Berlin bi de Akademie der Wissenschaften as Mitarbeiderin un möök ehren Dokter in Volkskunn 1983. Bet 1991 arbeid Fro Müns nu bi dat Wossidlo-Archiv (Institut för Volkskunde) in Rostock in de Wetenschop. Jüst so güng dat vun 1992 wieder, as se an't 'Bundesinstitut för Kultur un Geschichte vun de Düütschen in'n Oosten vun Europa' wesseln dä un an de Carl von Ossietzky-Universität in Ollnborg eenen Lehropdrag kreeg. Hier hett se arbeid, bet se in'n Rohstand güng.

Heike Müns arbeid un forscht öber Leder un Bruukdom, ünnersöcht de Alldagskultur vun de Düütschen in'n Oosten vun Europa un de Geschichte vun Wetenschop. 

Fro Müns hett Opsätzen schreben un Böker rutgeben, hett Leder sammelt un öber Festen un Fiern - sünnerlich in Meckelnborg-Vörpommern - forscht. Mit Böker as 'Ein paar hundert Strophen von Herrn Pasturn sien Kauh' un dat 'Niederdeutsches Liederbuch – Volkstümliche Lieder aus fünf Jahrhunderten' hett se sik as Expertin op dat Rebeed vun de Volkskunn utwiest. Een kann marken, wat se mit Liev un Seel forschen deit. 

De Quickborn-Pries vun de Sporkassenstiften Neddersassen ward no de Satzung 'für besondere Leistungen auf dem Gebiet der niederdeutschen Sprache, Literatur oder volkskundlichen Forschung' utgeben. Insett wöör de Pries al 1960 vun de Quickborn, Vereenigung för Nedderdüütsche Sprook un Literatur e.V., in Hamborg.